5 Gathas

FIVE GATHA Prayers

FIVE GATHA Prayers

 

GATHA AHUNAVAD

Yasna Hā 28

Yasna Hā 29

Yasna Hā 30

Yasna Hā 31

Yasna Hā 32

Yasna Hā 33

Yasna Hā 34

GATHA USHTAVAD

Yasna Hā 43.

Yasna Hā 44

Yasna Hā 45

Yasna Hā 46

GATHA Spentomad

Yasna Hā 47

Yasna Hā 48

Yasna Hā 49

Yasna Hā 50

GATHA Vohu-khshathra

Yasna Hā 51

GATHA VAHISTOISHT

Yasna Hā 53

 

The word Gatha means “a song”, and is derived from Avesta root “to sing”. The Gathas are recited as prayers, one on each of the five Gatha days, which occur at the end of the Parsi calendar year. The seventeen chapters of Gathas are included in the seventy-two chapters of the larger text of Yasna.

 

The Gathas are accorded the highest place in Zoroastrian scriptures, as they are the inspired words of prophet Zarathushtra himself. They are poetic in nature, and contain measured stanzas, with metre, syllables and pauses. The meanings of the Gathas contain lofty metaphysical ideas, which are very beneficial for the mental and spiritual progress of man. The chanting of the Gatha as a prayer is very efficacious when recited on the particular Gatha day.

 

 

GATHA AHUNAVAD

 

Ahunavad Gatha begins from Yasna Hā 28 and ends with Yasna Hā 34. These seven chapters should be recited on the Ahunavad Gatha day as under:

 

Khshnaothra ahurahe mazdāo. Ashem vōhū (1).

 

Pa nāme yazdān ahura mazda khodāe awazuni gorje khoreh awazāyād; geh gāthābyō ahunavad geh, ushtavad geh, spentomad geh, vohū-khshathra geh, vahīshtoisht geh, geh gāthābyō ardāfravash beresād.

 

Az hamā gunāh patet pashemānum, az harvastin dushmata duzhūkhta duzhvarshta, mem pa getī manīd, oem goft, oem kard, oem jast oem bun būd ested, az ān gunāh manashnī gavashnī kunashnī, tanī ravānī, getī minoānī, okhe avākhsh pashemān, pa se gavashni, pa petet hom. Khshnaothra ahurahe mazdāo, tarōidite angrahe mainyeush haithyāvarshtām hyat vasnā frashotemem. Staomi ashem. Ashem vohu 3.

 

Fravarāne mazdayasnō zarathushtrish vīdaēvo ahura-tkaēsho (Gāh according to the period of the day) frasastayaecha. Ahurahe mazdāo raevato khvarenanghato, ameshanām spentanām, gāthābyō spentābyō ratukhshathrābyō ashaonibyō, ahunavaityāo gāthayāo, ushtavaityāo gāthayāo, spentā-mainyeush gāthayāo, vohu-khshathrayāo gāthayāo, vahishtoishtōish gāthayāo, ashaonām fravashinām ughranām aivi-thūranām, paoiryo-takēshanām fravashinām nabānazdishtanām fravashinām. Khshnaothra yasnāicha vahmāicha khshnaothrāicha frasastayaēcha, yathā ahū vairyō zaotā frā me mrūte, athā ratūsh ashātchit hacha frā ashava vidhvāo mraotū.

 

Ahurem mazdãm raēvantem khvarenanghantem yazamaide; ameshā spentā hukhshathrā hudhāonghō yazamaide. Gāthāo spentāo ratukhshathrāo ashaonīsh yazamaide; ahunavaitīm gāthām ashaonīm ashahe ratūm yazamaide, ushtavaitīm gāthām ashaonīm ashahe ratūm yazamaide, spentā-maiyūm gāthām ashaonīm ashahe ratūm yazamaide, vohu-khshathrām gāthām ashaonīm ashahe ratūm yazamaide, vahishtōishtīm gāthām ashaonīm ashahe ratūm yazamaide. Ashaonām vanghuhīsh sūrāo spentāo fravashayō yazamaide. Ahunem vairīm tanūm pāiti, ahunem vairīm tanūm pāiti, ahunem vairīm tanūm pāiti; Yathā ahū vairyō (1).

Yasna Hā 28

  1. Yānīm manō, yānīm vachō, yānīm shyaothnem, ashaono zarathushtrahe,

frā ameshā spentā, gāthāo geurvāin. Nemō ve gāthāo ashaonāsh.

 

  1. Ahyā yāsā nemanghā, ushtānazastō rafedhrahyā;

mainyeush mazdāo paourvīm, spentahyā ashā vīspeng shyaothnā;

vangheush khratūm mananghō, yā khshnevishā geushchā urvānem. (Recite this stanza twice).

 

  1. Ye vāo mazdā ahurā, pairi-jasāi vohū mananghā;

maibyō dāvōi ahvāo, astvataschā hyatchā mananghō;

āyaptā ashāt hachā, yāish rapentō daidīt khāthre.

 

  1. Ye vāo ashā ufyānī, manaschā vohū apaourvīm;

mazdāmchā ahurem yaēibyō, khshathremchā agzhaonvamnem;

varedaitī ārmaitish, ā mōi rafedhrāi zaveng jasatā.

 

  1. Ye urvānem men gairīm, vohū dade hathrā mananghā;

ashīshchā shyaothananām, vidush mazdāo ahurahyā;

yavat isāi tavāchā, avat khshāi aēshe ashahyā.

 

  1. Ashā kat thwā daresānī, manaschā vohū vaēdimnō;

gātūmchā ahurāi, sevishtāi sraoshem mazdāi;

anā māthrā mazishtem, vāurōimaidī khrafstrā hizvā.

 

  1. Vohū gaidī mananghā, dāidī ashā dāo daregāyū;

ereshvaīsh tū ukhdhāish, mazdā zarathushtrāi aojonghvat rafenō;

ahmaibyāchā ahurā, yā daibishvatō dabaēshāo taurvayāmā.

 

  1. Dāidī ashā tām ashīm, vangheush āyaptā mananghō;

dāidī tū ārmaitē, vishtāspāi aēshem maibyāchā;

dāostū mazdā khshayāchā, yā ve mãthrā srevimā rādao.

 

  1. Vahishtem thwā vahishtā, yem ashā vahishtā hazaoshem;

ahurem yāsā vāunush, narōi frashaoshtrāi maibyāchā;

yaēibyaschā īt rāonghāonghōi, vīspāi yave vangheush mananghō.

 

  1. Anāish vāo nōit ahurā mazdā, ashemchā yānāish zaranaēmā;

manaschā hyat vahishtem, yōi ve yōithemā daseme stūtām;

yūzhem zevishtayāonghō, aēshō khshathremchā savanghām.

 

  1. At yeng ashāatchā vōistā, vangheushchā dātheng mananghō;

erethweng mazdā ahurā, aēibyō perenā apanāish kāmem;

at ve khshmaibyā asūnā vaēdā, kharethyā vaintyā sravāo.

 

  1. Ye āish ashem nipāonghe, manaschā vohū yavaētāite;

tvem mazdā ahurā, frō mā shīshā thwahmāt vaochanghe,

manyeush hachā thwā e e āonghō, yāish ā anghush paouruyō bavāt.

 

  1. Ahyā yāsā nemanghā, ushtānazastō rafedhrahyā;

mainyeush mazdāo paourvīm, spentahyā ashā vīspeng shyaothnā;

vangheush khratūm mananghō, yā khshnevishā geushchā urvānem. (Recite this stanza twice).

 

Yathā ahū vairyō (4) ; Ashem vohū (3)

Ahyā yāsām hāitīm yazamaide.

 

Yenghe hātām āat yesne paitī vanghō,

mazdāo ahurō vaēthā ashāt hachā,

yāonghāmchā tāschā tāoschā yazamaide.

 

Yasna Hā 29

  1. Khshmaibyā geush urvā gerezdā, kahmāi mā thwarōzhdūm ke mā tashat;

ā mā aēshemō hazaschā remō, āhushuyā dareshchā tevishchā;

nōit mōi vāstā khshmat anyō, athā mōi sāstā vohū vāstryā.

 

  1. Adā tashā geush peresat ashem, kathā tōi gavōi ratush;

hyat hīm dātā khshayantō, hadā vāstrā gaodāyō thwakhshō;

kem hōi ushtā ahurem, ye dregvōidibīsh aēshmem vādāyōit.

 

  1. Ahmāi ashā nōit sarejā, advaēshō gavōi paiti-mravat;

avaēshām nōit viduye, yā shavaite ādreng ereshvāonghō;

hātām hvō aojishtō, yahmāi zaveng jimā keredushā.

 

  1. Mazdāo sakhāre mairishtō, yā zī vāverezōi pairi-chithīt;

daēvāishchā mashyāishchā, yāchā vareshaite aipi-chthīt,

hvō vichirō ahurō, athā ne anghat, yathā hvō vasat.

 

  1. At vāo ushtānāish ahvāo, zastāish frīnemnā ahurāi ā;

me urvā geushchā azyāo, yat mazdām dvaidī ferasābyō;

nōit erezizyōi frajyāitīsh, nōit fshuyante dregvasū pairī.

 

  1. At e vaochat ahurō mazdāo, vīdvāo vafūsh vyānayā;

nōit aēvā ahū vistō, naēdā ratush ashātchīt hachā;

at zī thwā fshuyantaēchā, vāstryāichā thwōreshtā tatashā.

 

  1. Tem āzūtōish ahurō mãthrem, tashat ashā hazaoshō;

mazdāo gavōi khshvīdemchā, hvō urushaēibyō spentō sāsnyā;

kaste vohū mananghā, ye ī dāyāt e e ā vā maretaēibyō.

 

  1. Aēm mōi idā vistō, ye ne aēvō sāsnāo gūshatā;

zarathushtrō spitāmō, hvō ne mazdā vashtī ashāichā;

charekarethrā srāvayanghe, hyat hōi hudemem dyāi vakhedhrahyā.

 

  1. Atchā geush urvā raostā, ye anaēshām khshānmene rādem;

vāchim neresh asūrahyā, yem ā vasemī īshā-khshathrem;

kadā yavā hvō anghat, ye hōi dadat zastavat avō.

 

  1. Yūzhem aēibyō ahurā aogō, dātā ashā khshathremchā;

avat vohū mananghā, yā hushitīsh rāmāmchā dāt;

azemchīt ahyā mazdā, thwãm menghī paourvīm vaēdem.

 

  1. Kudā ashem vohuchā manō, khshathremchā at mā masā;

yuzem mazdā frākhshnene, mazōi magāi ā paitī zānatā;

ahurā nī-nāo avare ehmā rātōish yūshmāvatām.

 

  1. Ahyā yāsā nemanghā, ushtānazastō rafedhrahyā;

mainyeush mazdāo paourvīm, spentahyā ashā vīspeng shyaothnā;

vangheush khratūm mananghō, yā khshnevishā geushchā urvānem. (Recite this stanza twice).

 

Yathā ahū vairyō (4) ; Ashem vohū (3)

Khshmāvaya-geush-urvām hāitīm yazamaide.

 

Yenghe hātām āat yesne paitī vanghō,

mazdāo ahurō vaēthā ashāt hachā,

yāonghāmchā tāschā tāoschā yazamaide.

 

Yasna Hā 30

  1. At tā vakhshyā ishentō, yā mazdāthā hyat-chīt vīdushē;

staotāchā ahurāi yesnyāchā, vanghēush mananghō;

humāzdrā ashā yaēchā, yā raochēbīsh daresatā urvāzā.

 

  1. Sraotā gēush-āish vahishtā, avaēnatā sūchā mananghā;

āvarenāo vīchithahyā, narem narem khvakhyāi tanuyē;

parā mazē yāonghō, ahmāi nē sazdyāi baodantō paitī.

 

  1. At tā mainyū pouruyē, yā yēmā khvafenā asravātem;

manahichā vachahichā, shyaothanōi hī vahyō akemchā;

āoschā  hudāonghō, eresh vīshyātā nōit duzh-dāonghō.

 

  1. Atchā hyat tā hem mainyū, jasaetem paourvīm dazde;

gaēmchā ajyāitimchā, yathāchā   anghat apemem anghush,

achishtō dregvatām, at ashāune vahishtem manō.

 

  1. Ayāo manivāo varatā, ye dregvāo achishtā verezyō;

ashem mainyush spenishtō, ye kraozhdishteng asenō vaste;

yaechā khshnaoshen ahurem, haithyāish shyaothanāish fraoret mazdãm.

 

  1. Ayāo nōit eresh vīshyātā, daevāchinā hyat īsh āde baomā;

peresmaneng upā-jasat, hyat verenātā achisthem manō;

at aeshemem hendvārentā, yā bãnayen ahūm maretānō.

 

  1. Ahmāichā khshathrā jasat, mananghā vohū ashāchā;

at kehrpem utayūitish, dadāt ārmaitsh ãnmā;

aeshãm tōi ā anghat, yathā ayanghā ādānāish pouruyō.

 

  1. Atchā yadā aeshãm, kaenā, jamaiti aenanghãm;

at mazdā taibyō khshathrem, vohū mananghā voivīdāitī;

aeibyō saste ahurā, yōi ashāi daden zastayō drujem.

 

  1. Atchā tōi vaēm khyāmā, yōi īm frashem kerenaon ahūm,

mazdāoschā ahurāonghō, āmoyastrā baranā ashāchā

hyat hathrā manāo bavat yathrā, chistish anghat maēthā.

 

  1. Adā- zī avā drūjō avō, bavaitī skendō spayathrahyā;

at asishtā yaojante, ā hushitōish  vangheush mananghō;

mazdāo ashakhyāchā, yōi zazentī vanghāu sravahī.

 

  1. Hyat tā urvātā sashathā, yā mazdāo dadāt mashyāonghō;

khvītichā eneiti hyat-chā, daregem dregvōdebyō rashō;

savachā ashavabyō, at aipī tāish anghaitī ushtā.

 

  1. Ahyā yāsā nemanghā, ushtānazastō rafedhrahyā;

mainyeush mazdāo paourvīm, spentahyā ashā vīspeng shyaothnā;

vangheush khratūm mananghō, yā khshnevishā geushchā urvānem. (Recite this stanza twice).

 

Yathā ahū vairyō (4); Ashem vohū (3)

At-tā vakhshyām hāitīm yazamaide.

 

Yenghe hātām āat yesne paitī vanghō,

mazdāo ahurō vaēthā ashāt hachā,

yāonghāmchā tāschā tāoschā yazamaide.

 

Yasna Hā 31

  1. Tā vē urvātā marentō, agushtā vachāo senghāmahi;

aeibyo yōi urvātāish drujo, ashahyā gaethāo vimerenchaite;

atchit aeibyo vahishtā, yoi zarazdāo anghen mazdāi.

 

  1. Yezi āish nōit urvāne, advāo aibi-dereshtā vakhyāo;

at vāo vīspeng āyōi, yathā ratum ahuro vaedā;

mazdāo ayāo āsayāo, yā ashāt hachā jvāmahi.

 

  1. Yām dāo mainyu āthrāchā, ashāchā choish rānoibyā khshnutem;

hyat urvatem chazdonghvadebyo, tat ne mazdā vīdvanoi vaochā;

hizvā thwahyā āongho, yā jvanto vispeng vāurayā.

 

  1. Yadā ashem zevim anghen, mazdāoschā ahurāongho;

ashichā ārmaiti, vahishtā ishasā mananghā;

maibyō khshathrem aojonghvat, yehyā veredā vanaemā drujem.

 

  1. Tat mōi vichidyāi vaochā, hyat mōi ashā dātā vahyō;

Viduye vohū mananghā, menchā daidyāi yehyā mā ereshish;

Tāchit mazdā ahurā, yā nōit vā anghat anghaiti vā.

 

  1. Ahmāi anghat vahishtem, ye mōi vidvāo vaochat haithim;

māthrem yim haurvatātō, ashahyā ameretātaschā;

mazdāi avat khshathrem yat hōi vohū vakhshat mananghā.

 

  1. Yastā mantā pouruyō, raochebish rōithwen khvāthrā;

hvō khrathwā dãmish ashem, yā dārayat vahishtem manō;

tā mazdā mainyū ukhshyō, ye ā nūremchit ahurā hāmō.

 

  1. At thwā menghī paourvīm, mazdā yazūm stōi mananghā;

vangheush patarem mananghō, hyat thwā hem chashmaini hengrabem;

haithīm ashahyā dāmīm, angheush ahurem shyaothanaēshū

 

  1. Thwōi as ārmaitīsh, thwe ā geush tashā as khratūsh;

mainyush mazdā ahurā, hyat akhyāi dadāo pathãm;

vāstryāt vā āite, ye vā nōit anghat vāstryō.

 

  1. At hī ayāo fravaretā, vāstrīm akhyāi fshuyantem;

ahurem ashavanem, vangheush fshenghīm mananghō;

nōit mazdā avāstryō, davãschinā humeretōish bakhshtā.

 

  1. Hyat ne mazdā paourvīm, gaēthāoschā tashō daēnāoschā;

thwā mananghā khratūshchā, hyat astvantem dadāo ushtanem;

yat shyaothanāchā senghāchā, yathrā vareneng vasāo dāite.

 

  1. Athrā vāchem baraiti, mithahvachāo vā ereshvachāo vā

vīdvao vā evīdvāo vā, ahyā zarezdāchā mananghāchā;

ānush-hakhsh ārmaitīsh, mainyū peresāite yathrā maethā.

 

  1. Yā frasā āvishyā, yā vā mazdā peresāite tayā;

ye vā kaseush aenanghō, ā mazishtãm ayamaite būjem;

tā chashmeng thwisrā hārō, aibī ashā aibī vaenahī vīspā.

 

  1. Tā thwā peresā ahurā, yā zī āitī jenghatichā;

yāo ishudō dadente, dāthranãm hachā ashāunō;

yāoschā mazdā dregvōdebyō, yathā tāo anghen henkeretā hyat.

 

  1. Peresā avat yā mainish, ye dregvāite khshathrem hunāitī;

dush-shyaothanāi ahurā ye nōit, jyōtūm hanare vīnastī;

vāstryehyā aenanghō, paseush vīrāatchā adrujyantō.

 

  1. Peresā avat yathā hvō, ye hudānush demanahyā khshathrem;

shōithrahyā vā dakhyeush vā, ashā fradathāi asperezatā;

thwāvãs mazdā ahurā, yadā hvō anghat yā shyaothanaschā.

 

  1. Katārem ashavā vā, dregvāo vā verenvaite mazyō;

vīdvāo vīdushe mraotū, mā evīdvāo aipi-debāvayat;

zdī-ne mazdā ahurā, vangheush fradakhshtā mananghō.

 

  1. Mā chish at ve dregvatō, māthrāschā gūshtā sāsnāoschā;

āzī  demānem visem vā, shōithrem vā dakhyūm vā ādāt

dushitāchā marakaēchā, athā īsh sāzdūm snaithishā.

 

  1. Gūshtā ye mantā ashem, ahūmbish vīdvāo ahurā;

erezhukhdhāi vachanghãm, khshayamnō hizvō-vasō;

thwā āthrā sukhrā mazdā, vanghāu vīdātā rãnayāo.

 

  1. Ye āyat ashavanem, divamnem hōi aparem khshayō;

dareghem āyū temanghō, dushkhvarethem avaētās vachō;

tem vāo ahūm dregvantō, shyaothanāish khāish daēnā naēshat.

 

  1. Mazdāo dadāt ahurō, haurvatō ameretātaschā;

būrōish ā ashakhyāchā, khvāpaithyāt khshathrahyā sarō;

vangheush vazdvare mananghō, ye hōi māinyū shyaothanāishchā urvathō.

 

  1. Chithrā ī hudāonghe, yathanā vaedemnāi mananghā;

vohū hvō khshathrā ashem, vachanghā shyaothanāchā haptī;

hvō tōi mazdā ahurā, vāzishtō anghaitī astish.

 

  1. Ahyā yāsā nemanghā, ushtānazastō rafedhrahyā;

mainyeush mazdāo paourvīm, spentahyā ashā vīspeng shyaothnā;

vangheush khratūm mananghō, yā khshnevishā geushchā urvānem. (Recite this stanza twice).

 

Yathā ahū vairyō (4) ; Ashem vōhū (3)

Tā-ve urvātãm hāitīm yazamaide.

 

Yenghe hātãm āat yesne paitī vanghō,

mazdāo ahurō vaethā ashāt hachā,

yāonghãmchā tãschā tāoschā yazamaide.

 

Yasna Hā 32

  1. Akhyāchā khvaetush yāsat, ahyā verezenem mat airyamnā;

ahyā daevā mahmī manōi, ahurahyā urvāzemā mazdāo;

thwōi dūtāonghō āonghāmā, teng dārayō yōi vāo daibishentī.

 

  1. Aeibyō mazdāo ahurō, sāremnō vohū mananghā;

khshathrāt hachā paiti-mraot, ashā hush-hakhā khvenvātā;

spentãm ve armaitīm vanguhīm, varemaidī hā-ne anghat.

 

  1. At yūsh daevā vīspāonghō, akāt mananghō stā chithrem;

yaschā vāo mash yazaite, drujaschā pairi-matōishchā;

shyaōmãm aipī daibitānā, yāish asrūdūm būmyāo haptaithe.

 

  1. Yāt yūshchā framimathā, yā mashyā achishtā dantō;

vakhshente daevō-zushtā, vangheush sīzhdyamnā mananghō;

mazdāo ahurahyā, khrateush nasyantō ashāatchā.

 

  1. Tā debenaotā mashīm, hujyātōish ameretātaschā;

hyat vāo akā mananghā, yeng daeveng akashchā mainyush;

akā shyaothanem vachanghā, yā frachinas dregvantem khshayō.

 

  1. Pouru-aenāo enākhshtā, yāish srāvayeite yezī tāish athā;

hātā-marāne ahurā, vahishtā vōistā mananghā;

thwahmī vī mazdā khshathrōi, ashāichā senghō vīdām.

 

  1. Aeshãm aenanghãm, naechīt vīdvāo aojōi hādrōyā;

yā jōyā senghaite, yāish srāvī khvaenā ayanghā;

yaeshãm tū ahurā irikhtem, mazdā vaedishtō ahī.

 

  1. Aeshãm aenanghãm, vīvanghushō srāvī yimashcīt;

ye mashyeng chikhshnushō, ahmākeng gāush bagā khvāremnō;

aeshãmchīt ā ahmī thwahmī, mazdā vīchithōi aipī.

 

  1. Dush-sastish sravāo morendat, hvō jyāteush senghanāish khratūm;

apō mā īshtīm apayantā, berekhdhãm hāitīm vangheush mananghō,

tā ukhdhā manyeush mahyā, mazdā ashāichā yūshmaibyā gereze.

 

  1. Hvō mā-nā sravāo mōrendat, ye achishtem vaenanghe aogedā;

gãm ashibyā hvarechā, yaschā dātheng dregvatō dadāt;

yaschā vāstrā vīvāpat, yaschā vadare vōizhdat ashāune.

 

  1. Taechīt mā mōrenden jyōtūm, yōi dregvatō mazibīsh chikōisteresh;

anguhishchā anghavashcā, apayeitī raekh-nanghō vaedem;

yōi vahishtāt ashāunō, mazdā rāreshyãn mananghō.

 

  1. Yā rāonghayen sravanghā, vahishtāt shyaothanāt maretānō;

aeibyō mazdāo akā mraot, yōi geush mōrenden urvākhsh-ukhtī jyōtūm;

yāish gerehmā ashāt varatā, karapā khshathremchā īshanãm drujem.

 

  1. Yā khshathrā grehmō hīshāsat, achishtahyā demāne mananghā;

angheush marekhtārō ahyā, yaechā mazdā jīgerezat kāme;

thwahyā mãthrānō dūtem, ye-īsh pāt daresāt ashahyā.

 

  1. Ahyā gerehmō ā-hōithōi, nī kāvayaschīt khratūsh nī dadat;

varechāi hīchā fraidivā, hyat vīsentā dregvantem avō;

hyatchā gāush jaidyāi mraoī, ye dūraoshem saochayat avō.

 

  1. Anāish ā vī-nēnāsā, yā karapōtāoschā kevītāoshchā;

avāish aibī yeng daintī, nōit jyāteush khshyamneng vasō;

tōi ābyā bairyāonte, vangheush ā -demāne Mananghō.

 

  1. Hamem tat vahistāchīt, ye ushuruye syaschīt dahmahyā;

khshayãs mazdā ahurā, yehyā-mā āithishchīt dvaethā;

hyat aenanghe dregvatō, e-e-ānū ishyeng anghayā.

 

  1. Ahyā yāsā nemanghā, ushtānazastō rafedhrahyā;

mainyeush mazdāo paourvīm, spentahyā ashā vīspeng shyaothnā;

vangheush khratūm mananghō, yā khshnevishā geushchā urvānem. (Recite this stanza twice).

 

Yathā ahū vairyō (4) ; Ashem vōhū (3)

Khvaetumaithyem hāitīm yazamaide.

 

Yenghe hātãm āat yesne paitī vanghō,

mazdāo ahurō vaethā ashāt hachā,

yāonghãmchā tãschā tāoschā yazamaide.

 

Yasna Hā 33

  1. Yathā āish ithā vareshaite, yā dātā angheush paouruyehyā;

ratūsh shyaothanā razishtā, dregvataechā yatchā ashaone;

yehyāchā hem-yāsaite, mithahyā yāchā hōi ā erezvā.

 

  1. At ye akem dregvāite, vachanghā vā at vā mananhgā;

zastōibyā vā vareshaitī, vanghāu vā chōithaite astīm;

tōi vārāi rādentī, ahurahyā zaoshe mazdāo.

 

  1. Ye ashāune vahishtō, khaētū vā at vā verezenyō;

airyamnā vā ahurā, vīdās vā thwakhshanghā gavōi;

at hvō ashahyā anghat, vangheushchā vāstre mananghō.

 

  1. Ye thwat mazdā asrushtīm, akemchā manō yazāi apā;

khvaeteushchā taromaitīm, verezenahyāchā nazdishtãm drujem;

airyamanaschā nadentō, geushchā vāstrāt achishtem mantūm.

 

  1. Yaste vīspe-mazishtem, seraōshem zbayā avanghāne;

apānō daregō-jyāitīm, ā-khshathrem vangheush mananghō;

ashāt ā erezush pathō yaeshu mazdāo ahurō shaetī.

 

  1. Ye zaotā ashā erezush hvō manyeush ā vahishtāt kayā.

ahmāt avā mananghā, yā verezyeidyāi mantā vāstryā;

tā-toi izyā ahurā mazdā, darshtōishchā hem-parshtōishchā.

 

  1. Ā-mã āidūm vahishtā, ā khvaethyācha mazdā dareshatchā;

ashā vohū mananghā, yā sruye pare magāunō;

āvish-nāo antare hentū, nemakhvaitīsh chithrāo rātayō.

 

  1. Frō-mōi fravōizdūm arethā, tā yā vohū shavāi mananghā;

yasnem mazdā khsmāvatō, at vā ashā staomyā vachāo;

dātā ve ameretātascā, utayūitī haurvatās draonō.

 

  1. At tōi mazdā tem mainyūm, ashaokhshayantāo saredyayāo;

khvāthrā maethā mayā, vahishtā baretū mananghā;

ayāo ārōi hākurenem, yayāo hachinte urvānō.

 

  1. Vispāo stōi hujitayō, yāo zī āongharē yāoschā hentī,

yāoschā mazdā bavaintī, thwahmī hish zaoshe ābakhshohvā,

vohū ukhshyā mananghā, khshathrā ashāchā ushtā tanūm.

 

(To recite in Bāj-silence) shekasteh ghanāmenyo, bar ahereman leānat sad hazār bār.

 

(To recite aloud)

  1. Ye sevishtō ahurō, mazdāoschā ārmaitishchā;

ashemchā frādat-gaethem, manaschā vohū khshathremchā;

sraotā mōi marezdātā mōi, ādāi kahyāichīt paitī. (Recite this stanza thrice)

 

  1. Us mōi uzāreshvā ahurā, ārmaitī tevishīm dasvā;

spenishtā mainyū mazdā, vanghuyā zavō-ādā;

ashā hazō emavat, vohū mananghā fseratūm.

 

  1. Rafedhrāi vouru-chashāne, dōishī mōi yā-ve abifrā;

tā khshathrahyā ahurā, yā vangheush ashish mananghō;

frō spentā ārmaite, ashā daenāo fradakhshayā.

 

  1. At rātãm zarathushtrō, tanvaschīt khvakhyāo ushtanem;

dadāiti paurvatātem, mananghaschā vangheush mazdāi;

shyaothanahyā ashāi yāchā, ukhdhakhyāchā seraoshem khshathremchā.

 

  1. Ahyā yāsā nemanghā, ushtānazastō rafedhrahyā;

mainyeush mazdāo paourvīm, spentahyā ashā vīspeng shyaothnā;

vangheush khratūm mananghō, yā khshnevishā geushchā urvānem.(Recite this stanza twice).

 

Yathā ahū vairyō (4); Ashem vōhū (3)

Yathā-āish-ithãm hāitīm yazamaide.

 

Yenghe hātãm āat yesne paitī vanghō,

mazdāo ahurō vaethā ashāt hachā,

yāonghãmchā tãschā tāoschā yazamaide.

 

                                                Yasna Hā 34

1.Yā shyaothanā yā vachanghā, yā yasnā ameretātem;

ashemchā taeibyō dāonghā, mazdā khshathremchā haurvatātō;

aeshãm tōi ahurā, ehmā pourutemāish daste.

 

  1. At-chā ī-tōi mananghā mainyushcha vanghush vīspā dātā;

spentakhyāchā neresh shyaothanā, yehyā urvā ashā hachaite;

pairi gaethe khshmāvatō, vahme mazdā garōbīsh stūtãm.

 

  1. At tōi myazdem ahurā, nemanghā ashāichā dāmā;

gaethāo vīspāo ākhshathrōi, yāo vohū thraoshtā mananghā;

ārōi-zī hudāonghō, vīspāish mazdā khshmāvasū savō.

 

  1. At tōi ātarem ahurā, aojōnghvantem ashā usemahī;

asishtem emavantem, stōi rapentem chithrā-avanghem;

at mazdā daibishyante, zastā ishtāish dereshtā aenanghem.

 

  1. Kat ve khshathrem kā ishtish, shyaothnāish mazdā yathā vāo ahmī;

ashā vohū mananghā, thrāyōidyāi drigūm yushmākem;

pare vāo vispāish pare vaokhemā, daēvāishchā khrafstrāish mashyāishchā.

 

  1. Yezī athā stā haithīm, mazdā ashā vohū mananghā;

at tat mōi dakhshtem dātā, ahyā angheush vīspā maethā;

yathā vāo yazemnaschā, urvāidyāo stavas ayenī paitī.

 

  1. Kuthrā tōi aredrā mazdā, yōi vangheush vaedemnā mananghō;

senghūsh raekhnāo aspenchīt, sādrāchīt chakhrayō usheurū;

naechīm tem anyem yūshmat, vaedā ashā athā-nāo thrāzdūm.

 

  1. Tāish zī-nāo shyaothanāish byante, yaeshū as pairī pourubyō ithyejō;

hyat as aojyāo nāidyāonghem, thwahyā mazdā ãstā urvātahyā;

yōi nōit ashem mainyantā, aeibyō dūire vohū as manō.

 

  1. Yōi spentãm ārmaitīm, thwahyā mazdā berekhdhãm vīdushō;

dush-shyaothanā avazazat, vangheush evistī mananghō;

aeibyō mash ashā syazdat, yavat ahmat aurunā khrafstrā.

 

  1. Ahyā vangheush mananghō, shyaothanā vaochat garebãm hu-khratush;

spentãmchā ārmaitīm dãmīm, vidvāo hithãm ashahyā;

tāchā vīspā ahurā, thwahmī mazdā khshathrōi ā vōyathrā.

 

  1. At tōi ube haurvāoschā, khvarethāi ā ameretatāoschā;

angheush khshathrā mananghō, ashā mat ārmaitish vakhsht;

utayūitī tevīshī, tāish ā mazdā vīdvaeshãm thwōi ahī.

 

  1. Kat tōi rāzare kat vashī, kat vā stūtō kat vā yasnahyā;

srūidyāi mazdā frāvaochā, yā vīdāyāt ashish rāshnãm;

sīshā nāo ashā pathō, vangheush khvaeteng mananghō.

 

  1. Tem advānem ahurā, yem mōi mraosh vangheush mananghō;

daenāo saoshyantãm yā, hūkeretā ashāchīt urvākhshat;

hyat chivishtā hudābyō, mīzhdem mazdā yehyā tū dathrem.

 

  1. Tat zī mazdā vairīm, astvaite ushtānāi dātā;

Vangheush shyaothana mananghō, yōi zī geush verezene azyāo;

khshmākãm huchistīm ahurā, khrateush ashā frādō verezenā.

 

  1. Mazdā at mōi vahishtā, sravāoschā shyaothanāchā vaochā;

tā-tū vohū mananghā, ashāchā ishudem stūtō;

khshmākā khshathrā ahurā, frashem vasnā haithyem dāo ahūm.(Recite this stanza four times).

 

  1. Ahyā yāsā nemanghā, ushtānazastō rafedhrahyā;

mainyeush mazdāo paourvīm, spentahyā ashā vīspeng shyaothnā;

vangheush khratūm mananghō, yā khshnevishā geushchā urvānem. (Recite this stanza twice).

 

Yathā ahū vairyō (4); Ashem vōhū (3)

Yā-shyaothanãm hāitīm yazamaide.

Ahunavaitīm gāthãm ashaonīm ashahe ratūm yazamaide.

Ahunavaityāo gāthayāo handātā yazamaide.

 

Yenghe hātãm āat yesne paitī vanghō,

mazdāo ahurō vaethā ashāt hachā,

yāonghãmchā tãschā tāoschā yazamaide.

 

(To be recited in bāj) ahuramazda khōdāe, awazūnīe mardum, mardum sardagãn hamã sardagān hambāyaste vehān, ōem behedin māzdayasnãn, āgahī āstavānī nekī rasānad; aedūn bād. (To be recited loudly) Yathā ahū vairyō (2)

 

Yasnemcha vahmemcha aojascha zavarecha āfrīnāmi, ahurahe mazdāo raevatō khvarenanghatō, ameshanãm spentanãm, gāthābyō spentābyō ratu-khshathrābyō ashaonibyō, ahunavaityāo gāthayāo, ushtavaityāo gāthayāo, spentā mainyeush gāthayāo, vohu-kshathrayāo gāthayāo, vahishtōishtōish gāthayāo, ashāunãm fravashinãm ughranãm aiwithūranãm, paoiryō-tkaeshanãm fravashinãm, nabā-nazdishtanãm fravashinãm. Ashem vohū (1). Ahmāi raeshcha; Hazangrem; Jasa me avanghe; Kerfeh mōzd.

GATHA USHTAVAD

 

The Ushtavad Gatha begin with Yasna Hā 43 and ends with Yasna Hā 46. These four chapters should be recited on the Ushtavad Gatha day as under:

 

Khshnaothra ahurahe mazdāo. Ashem vōhū (1).

 

Pa nāme yazdān ahura mazda khodāe awazuni gorje khoreh awazāyād; geh gāthābyō ahunavad geh, ushtavad geh, spentomad geh, vohū-khshathra geh, vahīshtoisht geh, geh gāthābyō ardāfravash beresād.

 

Az hamā gunāh patet pashemānum, az harvastin dushmata duzhūkhta duzhvarshta, mem pa getī manīd, oem goft, oem kard, oem jast oem bun būd ested, az ān gunāh manashnī gavashnī kunashnī, tanī ravānī getī minoānī, okhe avākhsh pashemān pa se gavashni pa petet hom. Khshnaothra ahurahe mazdāo, tarōidite angrahe mainyeush haithyāvarshtām hyat vasnā frashotemem. Staomi ashem. Ashem vohu 3.

 

Fravarāne mazdayasnō zarathushtrish vīdaēvo ahura-tkaēsho (Gāh according to the period of the day) frasastayaecha. Ahurahe mazdāo raevato khvarenanghato, ameshanām spentanām, gāthābyō spentābyō ratukhshathrābyō ashaonibyō, ahunavaityāo gāthayāo, ushtavaityāo gāthayāo, spentā-mainyeush gāthayāo, vohu-khshathrayāo gāthayāo, vahishtoishtōish gāthayāo, ashaonām fravashinām ughranām aivi-thūranām, paoiry-taēshanām fravashinām nabānazdishtanām fravashinām. Khshnaothra yasnāicha vahmāicha khshnaothrāicha frasastayaēcha, yathā ahū vairyō zaotā frā me mrūte, athā ratūsh ashātchit hacha frā ashava vidhvāo mraotū.

 

Ahurem mazdam raēvantem khvarenanghantem yazamaide; ameshā spentā hukhshathrā hudhāonghō yazamaide. Gāthāo spentāo ratukhshathrāo ashaonīsh yazamaide; ahunavaitīm gāthām ashaonīm ashahe ratūm yazamaide, ushtavaitīm gāthām ashaonīm ashahe ratūm yazamaide, spentā-mainyūm gāthām ashaonīm ashahe ratūm yazamaide, vohu-khshathrām gāthām ashaonīm ashahe ratūm yazamaide, vahishtōishtīm gāthām ashaonīm ashahe ratūm yazamaide. Ashaonām vanghuhīsh sūrāo spentāo fravashayō yazamaide. Ahunem vairīm tanūm pāiti, ahunem vairīm tanūm pāiti, ahunem vairīm tanūm pāiti; Yathā ahū vairyō (1).

 

Yasna Hā 43

 

Nemō ve gāthāo ashaonīsh.

  1. Ushtā ahmāi yahmāi ushtā kahmāichīt,

vase-khshayãs mazdāo dāyāt ahurō,

utayūitī tevīshī gat tōi vasemī,

ashem deredyāi tat mōi dāo ārmaite,

rāyō ashīsh vangheush gaem mananghō.

(Recite this stanza twice).

 

  1. atchā ahmāi vīspanãm vahishtem,

khvāthrōyā nā khvāthrem daidītā,

thwā chīchīthwā spenishtā mainyū mazdā,

yā dāo ashā vangheush māyāo mananghō,

vīspā ayāre daregō-jyātōish urvādanghā.

 

  1. At hvō vangheush vahyō nā aibī jamyāt,

ye nāo erezūsh savanghō pathō sīshōit,

ahyā angheush astvatō mananghaschā,

haithyeng ā stīsh yeng ā shaētī ahurō,

aredrō thwāvās huzēntush spentō mazdā.

 

  1. At thwā menghāi takhmemchā spentem mazdā,

hyat tā zastā yā-tū hafshī avāo,

yāo dāo ashīsh dregvāite ashāunaechā,

thwahyā garemā āthrō ashā-aojanghō

hyat mōi vangheush haze jimat mananghō.

 

  1. Spentem at thwā mazdā menghī ahurā,

hyat thwā angheush zãthōi daresem paourvīm,

hyat dāo shyaothanā mīzhdavãn yāchā ukhdhā,

akem akāi vanguhīm ashīm vanghave,

thwā hunarā dāmōish urvaese apeme.

 

  1. Yahmī spentā thwā mainyū urvaese jasō,

mazdā khshathrā ahmī vohū mananghā,

yehyā   shyaothanāish gaethāo ashā frādente,

aeibyō ratush senghaitī ārmaitish,

thwahyā khrateush yem naechish dābayeitī.

 

  1. Spentem at thwā mazdā menghī ahurā,

hyat mā vohū pairi-jasat mananghā,

peresatchā mā chish ahī kahyā ahī,

kathā ayāre dakhshārā ferasyāi dishā,

aibī thwāhū gaethāhū tanushichā.

 

  1. At hōi aojī zarathushtrō paourvīm,

haithyō dvaeshāo hyat isōyā dregvāite,

at ashāune rafenō khyem aojōnghvat,

hyat ā būshtish vasase  khshathrahyā dyāi,

yavat ā thwā mazdā staomi ufyāchā.

 

  1. Spentem at thwā mazdā menghī ahurā,

hyat mā vohū pairi-jasat mananghā,

ahyā ferasem kahmāi   vīvīduye vashī,

at ā thwahmāi  āthre rātãm nemanghō,

ashahyā mā yavat isāi manyāi.

 

  1. At tū mōi dāish ashem hyat mā zaozaomī,

ārmaitī hachimnō īt ārem,

peresāchā nāo yā tōi ehmā parshtā,

parshtem zī thwā yathanā tat emavatãm,

hyat thwa khshayãs aeshem dyāt emavantem.

 

  1. Spentem at thwā mazdā menghī ahurā,

hyat mā vohū pairi-jasat mananghā,

hyat khshmā ukhdhāish dīdainghe paourvīm,

sādrā mōi sãs mashyaeshū zarazdāitish,

tat verezyeidyāi hyat mōi mraotā vahishtem.

 

  1. hyatchā mōi mraosh ashem jasō frākhshnene,

at tū-mōi nōit asrushtā pairyaoghzhā,

uzeredyāi parā hyat moi ā-jimat,

seraoshō ashī mãzā-rayā hachimnō,

yā ve ashīsh rānōibyō savōi vīdāyāt.

 

  1. Spentem at thwā mazdā menghī ahurā,

hyat mā vohū pairi-jasat mananghā,

arethā vōizdyāi kāmahyā tem mōi dātā,

daregahyā yāush yem vāo naechish dāreshtaite,

vairyāo stōish yā thwahmī khshathrōi vāchī.

 

  1. Hyat nā fryāi vaēdemnō isvā daidīt,

maibyō mazdā tavā rafenō frākhshnenem,

hyat thwa khshathrā ashāt hachā frākhshtā,

uzereidyāi azem saredanāo sēnghahyā,

mat tāish vīspāish yōi tōi māthrāo marenti.

 

  1. Spentem at thwā mazdā menghī ahurā,

hyat mā vohū pairi-jasat mananghā,

dakhshat ūshyā tūshnā maitish vahishtā,

nōit nā pourush dregvatō khyāt chikhshnushō,

at tōi vīspeng angreng ashāunō ādare.

 

  1. At ahurā hvō mainyūm zarathushtrō,

verente mazdā yaste chishchā spenishtō,

astvat ashem khyāt ushtānā aojōnghvat,

khveng-daresōi khshathrōi khyāt ārmaitish,

ashīm shyaothanāish vohū daidīt mananghā.

 

  1. Ushtā ahmāi yahmāi ushtā kahmāichīt,

vase-khshayãs mazdāo dāyāt ahurō,

utayūitī tevīshī gat tōi vasemī,

ashem deredyāi tat mōi dāo ārmaite,

rāyō ashīsh vangheush gaem mananghō. (Recite this stanza twice).

 

Ashem vohū (3). Ushtavaitīm hāitīm yazamaide.

Yenghe hātãm āat yesne paitī vanghō,

mazdāo ahurō vaethā ashāt hachā,

yāonghãmchā tãschā tāoschā yazamaide.

 

Yasna Hā 44

  1. Tat thwā peresā eresh mōi vaochā ahurā,

Nemanghō ā yathā neme khshmāvatō,

mazdā fryāi thwāvãs sakhyāt mavaite,

at ne ashā fryā dazdyāi hākurenā,

yathā-ne ā vohū jimat mananghā.

 

  1. Tat thwā peresā eresh mōi vaochā ahurā,

kathā angheush vahishtahyā paourvīm,

kāthe sūidyāi ye-ī paitishāt,

hvō zī ashā spentō irikhtem vīspōibyō,

hārō mainyū ahūmbīsh urvathō mazdā.

 

  1. Tat thwā peresā eresh mōi vaochā ahurā,

kasnā zãthā patā ashahyā paouruyō,

kasnā kheng staremchā dāt advānem,

kē yā māo ukhshyeitī nerefsaitī thwat,

tāchit mazdā vasemī anyāchā viduye.

 

  1. Tat thwā peresā eresh mōi vaochā ahurā,

kasnā deretā zāmchā adenabāoschā,

ava-pastōish kē apō urvarāoschā,

kē vātāish dvānmaibyaschā yaoget āsu,

kasnā vangheush mazdā dāmish mananghā.

 

  1. Tat thwā peresā eresh mōi vaochā ahurā,

kē hvāpāo raochāoschā dāt temāoschā,

kē hvāpāo khvafnemchā dāt zaēmāchā,

kē yā ushāo arem-pithwā khshapāchā,

yā manothrīsh chazdōnghvantem arethahyā.

 

  1. Tat thwā peresā eresh mōi vaochā ahurā,

yā fravakhshyā yezī tā athā haithyā,

ashem shyaothanāish debāzaitī ārmaitīsh,

taibyō khshathrem vohū chinas mananghā,

kaēibyō azīm rānyō-skeretīm gām tashō.

 

  1. Tat thwā peresā eresh mōi vaochā ahurā,

kē berekhdhām tāsht khshathrā mat ārmaitīm,

kē uzemem choret vyānayā puthrem pithre,

azem tāish thwā frākhshne avāmī mazdā,

spentā mainyū vispanām dātārem.

 

  1. Tat thwā peresā eresh mōi vaochā ahurā,

mendaidyāi yā-tōi mazdā ādishtish,

yāchā vohū ukhdhā frashī mananghā,

yāchā ashā angheush   arem vaedyāi,

kā-me urvā vohūurvāshat āgemat tā.

 

  1. Tat thwā peresā eresh mōi vaochā ahurā,

kathā-mōi yãm yaosh  daenãm yaozhdāne,

yãm hudānāush paitish-sakhyāt khshathrahyā,

ereshvā khshathrā thwāvãs asīshtīsh   mazdā,

hademōi ashā vohuchā shyãs mananghā.

 

  1. Tat thwā peresā eresh mōi vaochā ahurā,

tãm daenãm yā hātãm vahishtā,

yā-mōi gaethāo ashā frādōit hachemnā,

ārmatōish ukhdhāish shyaothanā eresh daidyat,

makhyāo chistōish  thwā īshtish usen mazdā.

 

  1. Tat thwā peresā eresh mōi vaochā ahurā,

kathā teng-ā vījemyāt ārmaitish,

yaeibyō mazdā thwōi vashyete daenā,

azem tōi āish pouruyō fravōivīde,

vīspeng anyeng manyeush spasyā dvaeshanghā.

 

  1. Tat thwā peresā eresh mōi vaochā ahurā,

ke ashavā yāish peresāi dregvāo vā,

katārem ā angrō vā hvō vā angrō,

ye mā dregvāo thwā savā paitī-erete,

chyanghat hvō nōit ayem angrō manyete.

 

  1. Tat thwā peresā eresh mōi vaochā ahurā,

kathā drujem nīsh ahmat ā nīsh-nāshāmā,

teng-ā avā yōi asrushtōish perenāonghō,

nōit ashahyā ādīvyeintī hachemnā,

nōit frasayā vangheush chākhnare mananghō.

 

  1. Tat thwā peresā eresh mōi vaochā ahurā,

kathā ashāi drujem dyãm zastayō,

nī hīm  merãzhdyāi thwahyā mãthrāish senghahyā,

emavaitim sinãm dāvōi dregvasū,

ā-īsh dvafsheng mazdā anāshe ãstãschā.

 

  1. Tat thwā peresā eresh mōi vaochā ahurā,

yezī ahyā ashā pōi mat khshayehī,

hyat hem spādā anaochanghā jamaete,

avāish urvātāish yā-tū mazdā dīderezhō,

kuthrā ayāo kahmāi vananãm dadāo.

 

  1. Tat thwā peresā eresh mōi vaochā ahurā,

ke verethrem-jā thwā  pōi senghā yōi hentī,

chithrā mōi dãm ahūmbish ratūm chizhdī,

at hōi vohū seraoshō jantū mananghā,

mazdā ahmāi yahmāi   vashi kahmāichīt.

 

  1. Tat thwā peresā eresh mōi vaochā ahurā,

kathā mazdā zarem charānī hachā khshmat,

āsketīm khshmākām hyatchā mōi khyāt vākhsh aeshō,

sarōi būzhdyāi haurvātā ameretātā,

avā mãthrā ye rāthemō ashāt hachā.

 

  1. Tat thwā peresā eresh mōi vaochā ahurā,

kathā ashā tat mīzhdem hanānī,

dasā aspāo arshnavaitīsh  ushtremchā,

hyat mōi mazdā apivaitī haurvātā,

ameretātā yathā hī taēibyō dāonghā.

 

  1. Tat thwā peresā eresh mōi vaochā ahurā,

yastat mīzhdem hanente nōit dāitī,

ye-īt ahmāi erezhukhdhāi nā dāite,

kā-tem ahyā mainish anghat pouruye,

vīdvāo avām yā-īm anghat apemā.

 

  1. Chithenā mazdā hukhshathrā daevā āonghare,

at īt peresā yōi pishyeintī aeibyō kãm,

yāish gãm karapā usikhshchā aeshemāi dātā,

yāchā kavā ãnmene urūdōyatā,

nōit hīm mizen ashā vāstrem frādanghe.

 

  1. Ushtā ahmāi yahmāi ushtā kahmāichīt,

vase-khshayãs mazdāo dāyāt ahurō,

utayūitī tevīshī gat tōi vasemī,

ashem deredyāi tat mōi dāo ārmaite,

rāyō ashīsh vangheush gaem mananghō. (Recite this stanza twice).

 

Ashem vohū (3). Tat thwā-peresãm hāitīm yazamaide.

Yenghe hātãm āat yesne paitī vanghō,

mazdāo ahurō vaethā ashāt hachā,

yāonghãmchā tãschā tāoschā yazamaide.

 

Yasna Hā 45

  1. At fravakhshyā nū gūshōdūm nū sraotā,

yaechā asnāt yaechā dūrāt ishathā,

nū īm vīspā chithre zī mazdāonghōdūm,

nōit daibitīm dush-sastish ahūm merãshyāt,

akā varanā dregvāo hizvā āveretō.

 

  1. At fravakhshyā angheush mainyū pouruye,

yayāo spanyāo ūitī mravat yem angrem,

nōit nā manāo nōit senghā nōit khratavō,

naedā varanā, nōit ukhdhā naedā shyaothanā,

nōit daenāo nōit urvānō hachainte.

 

  1. at fravakhshyā angheush ahyā pourvīm,

yā mōi vīdvāo mazdāo vaochat ahurō,

yōi īm ve nōit  ithā mãthrem vareshentī,

yathā īm menāichā vaocha-chā,

aeibyō  angheush avōi anghat apemem.

 

  1. At fravakhshyā angheush ahyā vahishtem,

ashāt hachā mazdāo vaēdā ye īm dāt,

patarem vangheush verezyantō mananghō,

at hōi dugedā hushyaothanā ārmaitīsh,

nōit diwzaidyāi vispā hishas ahurō.

 

  1. At fravakhshyā yat mōi mraot spentōtemō,

vache srūidyāi yat maretaēibyō vahishtem,

yōi mōi ahmāi seraoshem dān chayaschā,

upā jimen hurvātā ameretātā,

vangheush manyeush shyaothanāish mazdāo ahurō.

 

  1. At fravakhshyā vispanām mazishtem,

stavas ashā ye hudāo yōi henti,

spentā mainyū sraotū mazdāo ahurō,

yehyā vahme vohū frashī mananghā,

ahyā khratū frō mā sāstū vahishtā.

 

  1. Yehyā savā ishāontī rādanghō,

yōi-zī jvā āongharechā bavantichā,

ameretāitī ashāunō urvā aeshō,

utayūtā yā nerãsh sādrā dregvatō,

tāchā khshathrā mazdāo dãmish ahurō.

 

  1. tem ne staotāish nemanghō ā vīvareshō,

nū-zīt chashmainī vyādaresem,

vangheush manyeush  shyaothanahyā ukhdhakhyāchā,

vīdush ashā yem mazdãm ahurem,

at hōi vahmeng demāne garō nidāmā.

 

  1. tem ne vohū mat mananghā chikhshnushō,

ye-ne usen chōret spenchā aspenchā,

mazdāo khshathrā varezī nāo  dyāt ahurō,

pasush vīreng ahmākeng fradathāi ā,

vangheush ashā haozãthwāt ā mananghō.

 

  1. Tem ne yasnāish ārmatōish mimaghzhō,

ye ānmenī mazdāo srāvī ahurō,

yat mōi ashā vohuchā chōisht mananghā,

khshathrōi hōi haurvātā ameretātā,

ahmāi stōi dām tevīshī utayūitī.

 

  1. Yastā daeveng aparō mashyãschā,

tare-mãstā yōi īm tare-manyantā,

anyeng ahmāt ye hōi arem manyātā,

saoshyantō deng patōish spentā daenā,

urvathō brātā patā vā mazdā ahurā.

 

  1. Ushtā ahmāi yahmāi ushtā kahmāichīt,

vase-khshayãs mazdāo dāyāt ahurō,

utayūitī tevīshī gat tōi vasemī,

ashem deredyāi tat mōi dāo ārmaite,

rāyō ashīsh vangheush gaem mananghō. (Recite this stanza twice).

 

Ashem vohū (3). At-fravakhshyãm hāitīm yazamaide.

Yenghe hātãm āat yesne paitī vanghō,

mazdāo ahurō vaethā ashāt hachā,

yāonghãmchā tãschā tāoschā yazamaide.

 

Yasna Hā 46

  1. Kãm nemōi zãm kuthrā nemō ayenī,

pairī khaeteush airyamanaschā dadaitī,

nōit mā khshnāush yā verezenā hechā,

naedā dakhyeush yōi sāstārō dregvatō,

kathā thwā mazdā khshnaoshāi ahurā.

 

  1. Vaedā tat yā ahmī mazdā anaeshō,

mā kamnafshvā hyatchā kamnānā ahmī,

gerezōi tōi ā-īt avaenā ahurā,

rafedhrem chagvāo hyat fryō  fryāi daidīt,

ākhsō vangheush ashā ishtīm mananghō.

 

  1. Kadā mazdā yōi ukhshānō asnãm,

angheush darethrāi frō ashahyā frārente,

verezdāish senghāish   saoshyantãm khratavō,

kaeibyō ūthāi vohū jimat mananghā,

maibyō thwā sāstrāi verene ahurā.

 

  1. At teng dregvāo yeng ashahyā vazdreng pāt,

gāo frōretōish  shōithrahyā vā dakhyeush vā,

duzhazōbāo hãs khvāish shyaothanāish ahemustō,

yastem khshathrāt mazdā mōithat jyāteush vā,

hvō teng frō-gāo pathmeng huchistōish charāt.

 

  1. Ye vā khshayãs adãs drītā ayantem,

urvātōish vā huzentush mithrōibyō vā,

rashnā jvãs ye ashavā  dregvantem,

vīchirō hãs tat frō khvaetave mruyāt,

uzūithyōi īm mazdā khrūnyāt ahurā.

 

  1. At yastem nōit nā isemnō āyāt,

drūjō hvō dāmãn haithyā gāt,

hvō zī dregvāo ye dregvāite vahishtō,

hvō ashavā yahmāi ashavā fryō,

hyat daenāo paouruyāo dāo ahurā.

 

  1. Kem nā mazdā mavaite pāyūm dadāt,

hyat mā dregvāo didareshtā aēnanghē,

anyem thwahmāt āthraschā mananghaschā

yayāo shyaothanāish ashem thraoshtā ahurā,

tām mōi dāstvām daēnayāi frāvaochā.

 

  1. Ye vā mōi yāo gaethāo dazde aenanghe,

nōit ahyā mā āthrish shyaothanāish frosyāt,

paityaoget tā ahmāi jasōit dvaeshanghā,

tanvem ā yā im hujyātōish pāyāt,

nōit duzhjyātōish kāchit mazdā dvaeshanghā.

 

  1. Ke hvō ye-mā aredrō chōithat pouruyō,

yathā thwā zevīshtīm uzemōhī,

shyaothanōi spentem ahurem ashavanem,

yā-tōi ashā yā ashāi geush tashā mraot,

ishentī mā tā tōi vohū mananghā.

 

  1. Ye vā mōi nā genā vā mazdā ahurā,

dāyāt angheush yā tū vōista vahishtā,

ashīm ashāi vōhū khshathrem mananghā,

yãschā hakhshāi khshmāvatãm vahmāi ā,

frō tāish vīspāish chinvatō frafrā peretūm.

 

  1. Khshathrāish yūjen karapanō kāvayascha,

akāish shyaothanāish  ahūm merengeidyāi mashīm,

yeng khve urvā khvaechā khraodat daenā,

hyat aibī-gemen yathrā chinvatō peretush,

yavōi vīspāi drūjō demānāi astayō.

 

  1. Yat us ashā naptyaēshū nafshuchā,

tūrahyā uzjen fryānahyā aojyaēshū,

ārmatōish gaēthāo frādō thwakhshanghā,

at ish vohū hem aibī-mōist mananghā,

aēibyō rafedhrāi mazdāo saste ahurō.

 

  1. Ye spitāmem zarathushthrem rādanghā,

maretaeshū khshnāush hvō nā ferasrūidyāi eredhvō,

at hōi mazdāo ahūm dadāt ahurō,

ahmāi gaethāo vohū frādat mananghā,

tem ve ashā mehmaidī hush-hakhāim.

 

  1. Zarathushtrā kaste ashavā urvathō,

mazōi magāi ke vā ferasrūidyāi vashtī,

at hvō kavā vīshtāspō  yāhī,

yengstū mazdā hademōi minash ahurā,

teng zbayā vangheush ukhdhāish mananghō.

 

  1. Haechat-aspā vakhshyā ve spitamāonghō,

hyat dātheng vīchayathā adāthãschā,

tāish yūsh shyaothanāish ashem khshmaibyā daduye,

yāish dātāish paouruyāish ahurahyā.

 

  1. Ferashaoshtrā athrā-tū aredrāish idī,

hvōgvā tāish yeng usvahī ushtā-stōi,

yathrā ashā hachaite ārmaitish,

yathrā vangheush mananghō īshtā khshathrem,

yathrā mazdāo varedemãm shaeitī ahurō.

 

  1. Yathrā ve afshmānī senghānī,

nōit anafshmãm de-jamāspā    hvō-gvā,

hadā vestā vahmeng seraoshā rādanghō,

ye vīchinaot dāthemchā adāthemchā,

dangrā mantū ashā mazdāo ahurō.

 

  1. Ye maibyā yaosh ahmāi aschīt vahishtā,

makhyāo ishtōish vohū chōishem mananghā‚

ãsteng ahmāi ye nāo ãstāi daidītā,

mazdā  ashā khshmākem vārem khshnaoshemnō,

tat mōi khrateush mananghaschā vīchithem.

 

  1. Ye-mōi ashāt haithīm hachā vareshaitī,

zarathushtrāi hyat vasnā ferashōtemem,

ahmāi mīzhdem hanente parāhūm,

mane-vīstāish  mat vīspāish gāvā azī,

tāchīt mōi sãs tvem mazdā vaedishtō.

 

  1. Ushtā ahmāi yahmāi ushtā kahmāichīt,

vase-khshayãs mazdāo dāyāt ahurō,

utayūitī tevīshī gat tōi vasemī,

ashem deredyāi tat mōi dāo ārmaite,

rāyō ashīsh vangheush gaem mananghō. (Recite this stanza twice).

 

Ashem vohū (3). Kãmnemaezãm hāitīm yazamaide.

Ushtavaitīm gāthãm ashaonīm ashahe ratūm yazamaide.

Ushtavaityāo gāthayāo handātā yazamaide.

 

Yenghe hātãm āat yesne paitī vanghō,

mazdāo ahurō vaethā ashāt hachā,

yāonghãmchā tãschā tāoschā yazamaide.

 

(To be recited in bāj) Ahuramazda khōdāe, awazūnīe mardum, mardum sardagãn hamã sardagān hambāyaste vehān, ōem behedin māzdayasnãn āgahī āstavānī nekī rasānad; aedūn bād. (To be recited loudly) Yathā ahū vairyō (2)

 

Yasnemcha vahmemcha aojascha zavarecha āfrīnāmi, ahurahe mazdāo raevatō khvarenanguhatō, ameshanãm spentanãm, gāthābyō spentābyō ratu-khshathrābyō ashaonibyō, ahunavaityāo gāthayāo, ushtavaityāo gāthayāo, spentā mainyeush gāthayāo, vohu-kshathrayāo gāthayāo, vahishtōishtōish gāthayāo, ashāunãm fravashinãm ughranãm aiwithūranãm, paoiryō-tkaeshanãm fravashinãm, nabā-nazdishtanãm fravashinãm. Ashem vohū (1). Ahmāi raeshcha; Hazangrem; Jasa me avanghahe; Kerfeh mōzd.

 

GATHA Spentomad

Spentomad Gāthā begins from Yasna Hā 47 and ends with Yasna Hā 50. These four chapters should be recited on the Spentomad Gatha day as under:

 

Khshnaothra ahurahe mazdāo. Ashem vōhū (1).

 

Pa nāme yazdān ahura mazda khodāe awazuni gorje khoreh awazāyād; geh gāthābyō ahunavad geh, ushtavad geh, spentomad geh, vohū-khshathra geh, vahīshtoisht geh, geh gāthābyō ardāfravash beresād.

 

Az hamā gunāh patet pashemānum, az harvastin dushmata duzhūkhta duzhvarshta, mem pa getī manīd, oem goft, oem kard, oem jast oem bun būd ested, az ān gunāh manashnī gavashnī kunashnī, tanī ravānī getī minoānī, okhe avākhsh pashemān pa se gavashni pa petet hom. Khshnaothra ahurahe mazdāo, tarōidite angrahe mainyeush haithyāvarshtām hyat vasnā frashotemem. Staomi ashem. Ashem vohu 3.

 

Fravarāne mazdayasnō zarathushtrish vīdaēvo ahura-tkaēsho (Gāh according to the period of the day) frasastayaecha. Ahurahe mazdāo raevato khvarenanghato, ameshanām spentanām, gāthābyō spentābyō ratukhshathrābyō ashaonibyō, ahunavaityāo gāthayāo, ushtavaityāo gāthayāo, spentā-mainyeush gāthayāo, vohu-khshathrayāo gāthayāo, vahishtoishtōish gāthayāo, ashaonām fravashinām ughranām aivi-thūranām, paoiry-taēshanām fravashinām, nabānazdishtanām fravashinām. Khshnaothra yasnāicha vahmāicha khshnaothrāicha frasastayaēcha, yathā ahū vairyō zaotā frā me mrūte, athā ratūsh ashātchit hacha frā ashava vidhvāo mraotū.

 

Ahurem mazdam raēvantem khvarenanghantem yazamaide, ameshā spentā hukhshathrā hudhāonghō yazamaide. Gāthāo spentāo ratukhshathrāo ashaonīsh yazamaide; ahunavaitīm gāthām ashaonīm ashahe ratūm yazamaide, ushtavaitīm gāthām ashaonīm ashahe ratūm yazamaide, spentā-mainyūm gāthām ashaonīm ashahe ratūm yazamaide, vohu-khshathrām gāthām ashaonīm ashahe ratūm yazamaide, vahishtōishtīm gāthām ashaonīm ashahe ratūm yazamaide. Ashaonām vanghuhīsh sūrāo spentāo fravashayō yazamaide. Ahunem vairīm tanūm pāiti, ahunem vairīm tanūm pāiti, ahunem vairīm tanūm pāiti; Yathā ahū vairyō (1).

 

Yasna Hā 47

  1. Nemō ve gāthāo ashaonīsh.

spentā mainyū vahishtāchā mananghā,

hachā ashāt shyaothanāchā vachanghāchā,

ahmāi dãn haurvātā ameretātā,

mazdāo khshathrā ārmaitī ahurō.(Recite this stanza twice).

 

  1. Ahyā manyeush spenishtahyā vahishtem,

Hizvā ukhdhāish vangheush e-e-ānu mananghō,

ārmatōish zastōibyā shyaothanā verezyāt;

ōyā chistī hvō patā ashahyā mazdāo.

 

  1. Ahyā manyeush tvem ahī tā spentō,

ye ahmāi gãm rānyō-skeretīm hem-tashat,

at hōi vāstrāi rāmā-dāo ārmaitīm,

hyat hem vohū mazdā hem-frashtā mananghā.

 

  1. Ahmāt manyeush rāreshyeintī dregvantō,

mazdā spentāt nōit ithā ashāunō,

kaseushchīt nā ashāune kāthe anghat,

isvāchīt hãs paraosh akō dregvāite.

 

  1. Tāchā spentā mainyū mazdā ahurā,

ashāune chōish yā-zī   chīchā vahishtā,

hanare thwahmāt zaoshāt dregvāo bakhshaitī,

ahyā shyaothanāish akāt āshyãs mananghō.

 

  1. Tā dāo spentā mainyū mazdā ahurā,

āthrā vanghāu vīdāite rānōibyā,

ārmatōish debāzanghā ashakhvyāchā,

hā zī pourush ishentō vāurāite.

 

  1. Spentā manyū vahishtāchā mananghā,

hachā ashāt shyaothanāchā vachanghāchā,

ahmāi dãn haurvātā ameretātā,

mazdāo khshathrā ārmaitī ahurō. (Recite this stanza twice).

 

Ashem vohū (3). Spentā mainyūm hāitīm yazamaide.

Yenghe hātãm āat yesne paiti vanghō,

mazdāo ahurō vaethā ashāt hachā,

yāonghãmchā tãschā tāoschā yazamaide.

 

Yasna Hā 48

  1. Yezī adāish ashā drujem venghaitī,

hyat ãsashutā yā daibitānā fraokhtā,

ameretāitī daevāishchā mashyāishchā,

at tōi savāish vahmem vakhshat ahurā.

 

  1. Vaochā-mōi, yā tvem vīdvāo ahurā,

parā hyat mā yā meng perethā jimaitī,

kat ashavā mazdā venghat dregvantem,

hā-zī angheush vanguhī vistā ākeretish.

 

  1. At vaedemnāi vahishtā sāsnanãm,

yãm hudāo sāstī ashā ahurō,

spentō vīdvāo yaechit gūzrā senghāonghō,

thwāvãs mazdā vangheush khrathwā mananghō.

 

  1. Ye dāt manō vahyō mazdā ashyaschā,

hvō daenãm shyaothanāchā vachanghāchā,

ahyā zaosheng ushtish vareneng hachaite,

thwahmī khratāo apemem nanā anghat.

 

  1. Hukhshathrā khshentãm mā ne dush-khshathrā khshentā,

vanghuyāo chishtōish shyaothnāish ārmaite,

yaozhdāo mashyāi aipī zāthem vahishtā

gavōi verezyātãm tãm ne khvarethāi fshuyō.

 

  1. Hā-zī-ne hushōithemā hā-ne utayūitīm,

dāt tevīshīm vangheush mananghō berekhdhe,

at akhyāi ashā mazdāo urvarāo vakhshat,

ahurō angheush zãthōi paouruyehyā.

 

  1. Nī-aeshemō nī-dyātãm paiti remem paiti-syōdūm,

yōi ā vangheush mananghō dīdraghzhōduye,

ashā vyãm yehyā hithāush nā spentō,

at hōi dāmãm thwahmī ā-dãm ahurā.

 

  1. Kā-tōi vangheush mazdā khshathrahyā īshtish,

kā-tōi ashōish thwakhyāo maibyō ahurā,

kā thwōi ashā ākāo aredreng   ishyā,

vangheush manyeush  shyaothnanãm javarō.

 

  1. Kadā vaedā yezī chahyā khshayathā,

mazdā ashā yehyā-mā āithish dvaethā,

eresh-mōi erezhūchãm vangheush vafush mananghō,

vīdyāt saoshyãs yathā hōi ashish anghat.

 

  1. Kadā mazdā mānarōish narō vīsente,

kadā ajen mūthrem ahyā madahyā,

yā angrayā karapanō urūpayeintī,

yāchā khratū dushe-khshathrā dakhyunãm.

 

  1. Kadā mazdā ashā mat ārmaitish,

jimat khshathrā hushitish vāstravaitī,

kōi dregvōdebīsh khrūrāish rāmãm dāonte,

keng ā angheush jimat mananghō chistish.

 

  1. At tōi anghen saoshyantō dakhyunãm,

yōi khshnūm vohū mananghā hachāonte,

shyaothanāish  ashā thwahyā mazdā senghahayā,

tōi zī data hamaestārō aeshem mahyā.

 

  1. Spentā manyū vahishtāchā mananghā,

hachā ashāt shyaothanāchā vachanghāchā,

ahmāi dãn haurvātā ameretātā,

mazdāo khshathrā ārmaitī ahurō.(Recite this stanza twice).

 

Ashem vohū (3). Yezi idhãm hāitīm yazamaide.

Yenghe hātãm āat yesne paiti vanghō,

mazdāo ahurō vaethā ashāt hachā,

yāonghãmchā tãschā tāoschā yazamaide.

 

Yasna Hā 49

  1. At mā yavā bendvō pafre mazishtō,

Ye dush-erethrīsh chikhshnushā ashā mazdā,

vanguhī ādā gaidī mōi ā-mōi arapā,

ahyā vohū āōshō vīdā mananghā.

 

  1. At ahyā mā bendvahyā mānayeitī,

tkaeshō dregvāo daibitā ashāt rāreshō,

nōit spentãm dōresht ahmāi stōi ārmaitīm,

naedā vohū mazdā frashtā mananghā.

 

  1. Atchā ahmāi varenāi mazdā nidātem,

ashem sūidyāi tkaeshāi rāshayenghe drukhsh,

tā vangheush sare izyā mananghō,

antare vīspeng dregvatō hakhmeng antare-mrūye.

 

  1. Yōi dush-khrathwā aeshemem vareden rāmemchā,

khvāish hizubīsh fshuyasū afshuyantō,

yaeshãm nōit hvarshtāish vãs duzhvarshtā,

tōi daeveng dãn yā dregvatō daenā.

 

  1. At hvō mazdā īzhāchā āzūitishchā,

ye daenãm vohū sārshtā mananghā,

ārmatōish kaschīt ashā huzentush,

tāishchā vīspāish thwahmī khshathrōi ahurā.

 

  1. Frō vāo fraeshyā mazdā ashemchā mrūite

yā ve khrateush khshmākahyā ā-mananghā,

eresh vīchidyāi yathā-ī srāvayaemā,

tãm daenãm yā khshmāvatō ahurā.

 

  1. Tatchā vohū mazdā sraotū mananghā,

sraotū ashā gushahvā-tū ahurā,

ke airyamā ke khvaetush dātāish anghat,

ye verezenāi vanguhīm dāt frasastīm.

 

  1. Ferashaoshtrāi urvāzishtãm ashahyā dāo,

sarem tat thwā mazdā yāsā ahurā,

maibyāchā yãm vanghāu thwahmī a-khshathrōi,

yavōi vīspāi fraeshtāonghō āonghāmā.

 

  1. Sraotū sāsnāo fshenghyō suye tashtō,

nōit eresh-vachāo sarem dadãs dregvātā,

hyat daenāo vahishte yūjen mīzhde,

ashā yukhtā yāhi de-jāmāspā.

 

  1. Tatchā mazdā thwahmī ādãm nipāonghe,

manō vohū urunaschā ashāunãm,

nemaschā yā ārmaitish īzhāchā,

mãzā khshathrā vazdanghā avemīrā.

 

  1. At dushkhshathreng dush-shyaothaneng duzhvachangō,

duzh-daeneng dush-mananghō dregvatō,

akāish khvarethāish paitī urvānō paityeintī,

drujō demāne  haithyā anghen astayō.

 

  1. Kat tōi ashā zbayente avanghō,

zarathushtrāi kat tōi vohū mananghā,

ye ve staotāish mazdā frināi ahurā,

avat yāsãs hyat ve ishtā vahishtem.

 

  1. Spentā manyū vahishtāchā mananghā,

hachā ashāt shyaothanāchā vachanghāchā,

ahmāi dãn haurvātā ameretātā,

mazdāo khshathrā ārmaitī ahurō.(Recite this stanza twice).

 

Ashem vohū (3). At-māyavãm hāitīm yazamaide.

yenghe hātãm āat yesne paiti vanghō,

mazdāo ahurō vaethā ashāt hachā,

yāonghãmchā tãschā tāoschā yazamaide.

 

 Yasna Hā 50

  1. Kat mōi urvā ise chahyā avanghō,

ke-mōi paseush ke me nā thrātā vistō,

anyō ahsāt thwatchā mazdā ahurā,

azdā zūtā vahishtāatchā mananghō.

 

  1. Kathā mazdā rānyō-skeretīm gãm ishasōit,

ye-hīm ahmāi   vāstravaitīm stōi usyāt;

erezhejīsh ashā pourushū hvare-pishyasū

ākāsteng mā nishãsyā dāthem dāhvā.

 

  1. Atchīt ahmāi mazdā ashā anghaitī,

yãm hōi khshathrā vohuchā chōisht mananghā,

ye-nā ashōish aojanghā varedayaetā,

yãm nazdishtãm gaethãm dregvāo bakhshaitī.

 

  1. At vāo yazāi stavas mazdā ahurā,

hadā ashā vahishtāchā mananghā,

khshathrāchā yā īshō   stāonghat ā-paithī,

ākāo aredreng  demāne garō seraoshāne.

 

  1. Arōi-zī khshmā mazdā ashā ahurā,

hyat yūshmākāi mãthrāne vaorāzathā,

aibī-dereshtā āvīshyā   avanghā,

zastāishtā yā-nāo khvāthre dāyāt.

 

  1. Ye mãthrā vāchem mazdā baraitī,

urvathō ashā nemanghā zarathushtrō,

dātā khrateush hizvō raithīm stōi,

mahyā rāzeng vohū sāhīt mananghā.

 

  1. At ve yaojā zevīshtyeng urvatō,

jayāish perethūsh vahmahyā yūshmākahyā,

mazdā ashā ugreng vohū mananghā,

yāish azāthā mahmāi khyātā avanghe.

 

  1. Mat vāo padāish yā frasrūtā īzhayāo,

pairi-jasāi mazdā ustāna zastō,

at vāo ashā aredrakhyāchā nemanghā,

at vāo vangheush mananghō hunaretātā.

 

  1. Tāish vāo yasnāish paiti stavas ayenī,

mazdā ashā vangheush shyaothanāish mananghō,

yadā ashōish makhyāo vase khshayā,

at hudānāush ishayãs  gerezdā khyem.

 

  1. At yā vareshā yāchā pairī āish shyaothanā,

yāchā   vohū chashmãm arejat mananghā,

raochāo khveng asnãm ukhshā ae-urush,

khshmākāi ashā vahmāi mazdā ahurā.

 

  1. At ve staotā aojāi mazdā āonghāchā,

yavat ashā tavāchā isāichā,

data angheush aredat vohū mananghā,

haithyā-varshtãm hyat vasnā ferashōtemem.

 

  1. Spentā manyū vahishtāchā mananghā,

hachā ashāt shyaothanāchā vachanghāchā,

ahmāi dãn haurvātā ameretātā,

mazdāo khshathrā ārmaitī ahurō.(Recite this stanza twice).

 

Ashem vohū (3). Kat-mōi-urvãm hāitīm yazamaide.

Spentā-mainyūm  gāthãm ashaonīm ashahe ratūm yazamaide.

spentā-mainyeush  gāthayāo handātā yazamaide.

 

Yenghe hātãm āat yesne paitī vanghō,

mazdāo ahurō vaethā ashāt hachā,

yāonghãmchā tãschā tāoschā yazamaide.

 

(To be recited in bāj) Ahuramazda khōdāe, awazūnīe mardum, mardum sardagãn hamã sardagān hambāyaste vehān, ōem behedin māzdayasnãn, āgahī āstavānī nekī rasānad; aedūn bād. (To be recited loudly) Yathā ahū vairyō (2)

 

Yasnemcha vahmemcha aojascha zavarecha āfrīnāmi, ahurahe mazdāo raevatō khvarenanguhatō, ameshanãm spentanãm, gāthābyō spentābyō ratu-khshathrābyō ashaonibyō, ahunavaityāo gāthayāo, ushtavaityāo gāthayāo, spentā mainyeush gāthayāo, vohu-kshathrayāo gāthayāo, vahishtōishtōish gāthayāo, ashāunãm fravashinãm ughranãm aiwithūranãm, paoiryō-tkaeshanãm fravashinãm, nabā-nazdishtanãm fravashinãm. Ashem vohū (1). Ahmāi raeshcha; Hazangrem; Jasa me avanghe; Kerfeh mōzd.

 

 

GATHA Vohu-khshathra

Vohu-khshathra Gatha has only Yasna Hā 51. It should be recited on the Vohu-khshathra Gatha day as under:

 

Khshnaothra ahurahe mazdāo. Ashem vōhū (1).

 

Pa nāme yazdān ahura mazda khodāe awazuni gorje khoreh awazāyād; geh gāthābyō ahunavad geh, ushtavad geh, spentomad geh, vohū-khshathra geh, vahīshtoisht geh, geh gāthābyō ardāfravash beresād.

 

Az hamā gunāh patet pashemānum, az harvastin dushmata duzhūkhta duzhvarshta, mem pa getī manīd, oem goft, oem kard, oem jast oem bun būd ested, az ān gunāh manashnī gavashnī kunashnī, tanī ravānī getī minoānī, okhe avākhsh pashemān pa se gavashni pa petet hom. Khshnaothra ahurahe mazdāo, tarōidite angrahe mainyeush haithyāvarshtām hyat vasnā frashotemem. Staomi ashem. Ashem vohu 3.

 

Fravarāne mazdayasnō zarathushtrish vīdaēvo ahura-tkaēsho (Gāh according to the period of the day) frasastayaecha. Ahurahe mazdāo raevato khvarenanghato, ameshanām spentanām, gāthābyō spentābyō ratukhshathrābyō ashaonibyō, ahunavaityāo gāthayāo, ushtavaityāo gāthayāo, spentā-mainyeush gāthayāo, vohu-khshathrayāo gāthayāo, vahishtoishtōish gāthayāo, ashaonām fravashinām ughranām aivi-thūranām, paoiryo-tkaēshanām fravashinām nabā-nazdishtanām fravashinām. Khshnaothra yasnāicha vahmāicha khshnaothrāicha frasastayaēcha, yathā ahū vairyō zaotā frā me mrūte, athā ratūsh ashātchit hacha frā ashava vidhvāo mraotū.

 

Ahurem mazdam raēvantem khvarenanghantem yazamaide, ameshā spentā hukhshathrā hudhāonghō yazamaide. Gāthāo spentāo ratukhshathrāo ashaonīsh yazamaide; ahunavaitīm gāthām ashaonīm ashahe ratūm yazamaide, ushtavaitīm gāthām ashaonīm ashahe ratūm yazamaide, spentā-maiyūm gāthām ashaonīm ashahe ratūm yazamaide, vohu-khshathrām gāthām ashaonīm ashahe ratūm yazamaide, vahishtōishtīm gāthām ashaonīm ashahe ratūm yazamaide. Ashaonām vanghuhīsh sūrāo spentāo fravashayō yazamaide. Ahunem vairīm tanūm pāiti, ahunem vairīm tanūm pāiti, ahunem vairīm tanūm pāiti; Yathā ahū vairyō (1).

 

Yasna Hā 51

Nemō ve gāthāo ashaonīsh!

  1. Vohū khshathrem vairīm, bāgem aibī-bairishtem;

vīdīshemnāish īzhāchīt, ashā antare-charaitī;

shyaothanāish mazdā vahishtem, tat ne nūchīt vareshāne.(Recite this stanza twice).

 

  1. Tā-ve mazdā paourvīm, ahurā ashāi yechā;

taibyāchã ārmaite, dōishā-mōi ishtōish khshathrem;

khshmākem vohū mananghā,  vahmāi dāidī savanghō.

 

  1. Ā-ve geush ā hemyantū, yōi ve shyaothanāish sārente;

ahurō ashā hizvā, ukhdhāish vangheush mananghō;

yaeshãm tū pouruyō, mazdā fradakhshtā ahī.

 

  1. Kuthrā ārōish ā fseratush, kuthrā merezhdikā akhshtat;

kuthrā yasō khyen ashem, kū spentā ārmaitish;

kuthrā manō vahishtem, kuthrā thwā khshathrā mazdāo.

 

  1. Vīspā-tā peresãs, yathā ashāt hachā gãm vīdat;

vāstryō shyaothanāish, ereshvō hãs hu-khratush nemanghā;

ye dāthaeibyō eresh-ratūm, khshayãs ashivāo chistā.

 

  1. Ye vahyō vangheush dazde, yaschā hōi vārāi rādat;

ahurō khshathrā mazdāo, at ahmāi akāt ashyō;

ye hōi nōit vīdāitī, apeme angheush urvaese.

 

  1. Dāidī-mōi ye gãm tashō, apaschā urvarāoschā;

Ameretātā haurvātā, spenishtā mainyū mazdā;

tevīshī utayūitī, mananghā vohū senghe.

 

  1. At zī tōi vakhshyā, mazdā vīdushe zī-nā mruyāt;

hyat akōyā dregvāite, ushtā ye ashem dādre;

hvō zī mãthrā shyātō, ye vīdushe mravaitī.

 

  1. Yãm khshnūtem rānōibyā dāo, thwā āthrā sukhrā mazdā;

ayanghā khshustā, aibī ahvāhū dakhshtem dāvōi;

rāshyenghe dregvantem, savayō ashavanem.

 

  1. At ye mā-nā marekhshaite, anyāthā ahmāt mazdā;

hvō dāmōish drujō hunush, tā duzhdāo yōi hentī;

maibyō zbayā  ashem, vanghuyā ashī gat te.

 

  1. Ke urvathō spitamāi, zarathushtrāi nā mazdā;

ke vā ashā āfrashtā, kā spentā ārmaitish;

ke vā vangheush mananghō,   achistā magāi ereshvō.

 

  1. Nōit tā-īm khshnāush vaepayō, kevīnō peretō zemō;

zarathushtrem spitāmem, hyat ahmī urūraost astō;

hyat hōi īm charataschā, aodereshchā zōishenū vāzā,

 

  1. Tā dregvatō maredaitī, daenā erezāush haithīm;

yehyā urvā khraodaitī, chinvatō peretāo ākāo;

khvāish shyaothanāish hizvaschā, ashahyā nãsvāo pathō.

 

  1. Nōit urvāthā dātōibyaschā, karapanō vāstrāt arem;

gavōi ārōish āsendā khvāish,   shyaothanāishchā senghāishchā;

ye-īsh senghō apemem, drujō demāne ādāt.

 

  1. Hyat mīzhdem zarathushtrō, magavabyō chōisht parā;

garō demāne ahurō, mazdāo jasat pouruyō;

tā ve vohū mananghā, ashāichā savāish chivīshī.

 

  1. Tãm kavā vishtāspō, magahyā khshathrā nãsat;

vangheush padebīsh mananghō, yãm chistīm ashā mantā;

spentō mazdāo ahurō, athā-ne sazdyāi ushtā.

 

  1. Berekhdhãm mōi ferashaoshtrō, hvō-gvō daedōisht kehrpem;

daenayāi vanghuyāi, yãm hōi ishyãm dātū,

khshayãs mazdāo ahurō, ashahyā āzhdyāi gerezdūm.

 

  1. Tãm chistīm de-jāmāspō, hvōgvō ishtōish khvarenāo;

ashā verentō tat khshathrem, mananghō vangheush vīdō;

tat mōi dāidī ahurā, hyat mazdā rapen tavā.

 

  1. Hvō tat nā maidyō-māonghā, spitamāi ahmāi dazde;

daenayā vaedemnō, ye ahūm ishasãs aibī;

mazdāo dātā mraot, gayehyā shyaothanāish vahyō.

 

  1. tat ve-ne hazaoshāonghō, vīspāonghō daidyai savō;

ashem vohū mananghā, ukhdhā yāish ārmaitish;

yazemnāonghō nemanghā, mazdāo rafedhrem chagedō.

 

  1. Ārmatōish nā spentō, hvō chistī ukhdhāish shyaothanā;

Daenā ashem spenvat, vohū khshathrem mananghā;

mazdāo dadāt ahurō, tem vanguhīm yāsā ashīm.

 

  1. Yehyā mōi ashāt hachā, vahishtem yesne paitī,

vaedā mazdāo ahurō, yōi āongharechā hentichā,

tã yazāi khvāish nāmenīsh, pairichā jasāi vantā.

 

  1. Vohū khshathrem vairīm, bāgem aibī-bairishtem;

vīdīshemnāish īzhāchīt, ashā antare-charaitī;

shyaothanāish mazdā vahishtem, tat ne nūchīt vareshāne.(Recite this stanza twice).

 

Ashem vōhū (3)

Vohu-khshathrãm hāitīm yazamaide.

vohu-khshathrãm gāthãm ashaonīm ashahe ratūm yazamaide.

vohu-khshathrayāo gāthayāo handātā yazamaide.

 

Yenghe hātãm āat yesne paitī vanghō,

mazdāo ahurō vaethā ashāt hachā,

yāonghãmchā tãschā tāoschā yazamaide.

 

(To be recited in bāj) ahuramazda khōdāe, awazūnīe mardum, mardum sardagãn hamã sardagān hambāyaste vehān, ōem behedin māzdayasnãn āgahī āstavānī nekī rasānad; aedūn bād. (To be recited loudly) yathā ahū vairyō (2)

 

Yasnemcha vahmemcha aojascha zavarecha āfrīnāmi, ahurahe mazdāo raevatō khvarenanghatō, ameshanãm spentanãm, gāthābyō spentābyō ratu-khshathrābyō ashaonibyō, ahunavaityāo gāthayāo, ushtavaityāo gāthayāo, spentā mainyeush gāthayāo, vohu-kshathrayāo gāthayāo, vahishtōishtōish gāthayāo. Ashāunãm fravashinãm ughranãm aiwithūranãm, paoiryō-tkaeshanãm fravashinãm, nabā-nazdishtanãm fravashinãm. Ashem vohū (1). Ahmāi raeshcha; Hazangrem; Jasa me avanghe; Kerfeh mōzd.

 

 

GATHA VAHISTOISHT

Vahistōisht Gatha has only Yasna Hā 53. It should be recited on the Vahistōisht Gatha day as under:

Khshnaothra ahurahe mazdāo. Ashem vōhū (1).

 

Pa nāme yazdān ahura mazda khodāe awazuni gorje khoreh awazāyād; geh gāthābyō ahunavad geh, ushtavad geh, spentomad geh, vohū-khshathra geh, vahīshtoisht geh, geh gāthābyō ardāfravash beresād.

 

Az hamā gunāh patet pashemānum, az harvastin dushmata duzhūkhta duzhvarshta, mem pa getī manīd, oem goft, oem kard, oem jast oem bun būd ested, az ān gunāh manashnī gavashnī kunashnī, tanī ravānī getī minoānī, okhe avākhsh pashemān pa se gavashni pa petet hom. Khshnaothra ahurahe mazdāo, tarōidite angrahe mainyeush haithyāvarshtām hyat vasnā frashotemem. Staomi ashem. Ashem vohu 3.

 

Fravarāne mazdayasnō zarathushtrish vīdaēvo ahura-tkaēsho (Gāh according to the period of the day) frasastayaecha. Ahurahe mazdāo raevato khvarenanghato, ameshanām spentanām, gāthābyō spentābyō ratukhshathrābyō ashaonibyō, ahunavaityāo gāthayāo, ushtavaityāo gāthayāo, spentā-mainyeush gāthayāo, vohu-khshathrayāo gāthayāo, vahishtoishtōish gāthayāo, ashaonām fravashinām ughranām aivi-thūranām, paoiry-taēshanām fravashinām nabānazdishtanām fravashinām. Khshnaothra yasnāicha vahmāicha khshnaothrāicha frasastayaēcha, yathā ahū vairyō zaotā frā me mrūte, athā ratūsh ashātchit hacha frā ashava vidhvāo mraotū.

 

Ahurem mazdam raēvantem khvarenanghantem yazamaide; ameshā spentā hukhshathrā hudhāonghō yazamaide. Gāthāo spentāo ratukhshathrāo ashaonīsh yazamaide; ahunavaitīm gāthām ashaonīm ashahe ratūm yazamaide, ushtavaitīm gāthām ashaonīm ashahe ratūm yazamaide, spentā-mainyūm gāthām ashaonīm ashahe ratūm yazamaide, vohu-khshathrām gāthām ashaonīm ashahe ratūm yazamaide, vahishtōishtīm gāthām ashaonīm ashahe ratūm yazamaide. Ashaonām vanghuhīsh sūrāo spentāo fravashayō yazamaide. Ahunem vairīm tanūm pāiti, ahunem vairīm tanūm pāiti, ahunem vairīm tanūm pāiti; Yathā ahū vairyō (1).

Yasna Hā 53

Nemō ve gāthāo ashaonīsh!

 

  1. Vahishtā īshtish srāvī, zarathushtrahe,

spitāmahyā yezī hōi dāt āyaptā,

ashāt hachā ahurō mazdāo, yavōi vīspāi ā hvanghevīm;

yaechā hōi daben sashkenchā, daenayāo vanghuyāo ukhdhā shyaothanāchā. (Recite this stanza twice).

 

  1. atchā hōi schantū mananghā, ukhdhāish shyaothanāishchā,

khshnūm mazdāo vahmāi, ā fraoret yasnãschā,

kavachā vishtāspō, zarathushtrish spitāmō, frashaoshtraschā;

dāonghō erezush pathō, yãm daenãm ahurō, saoshyantō dadāt.

 

  1. Temchā-tū pouruchistā, haechat-aspānā;

spitāmī yezivī dugedrãm, zarathushtrahe;

vangheush paityāstem mananghō, ashahyā mazdāoschā taibyō dāt sarem;

athā hem ferashvā thwa, khrathwā spenishtā ārmatōish, hudānvareshvā.

 

  1. Tem zī vī speredānī varānī, yā fedhrōi vīdāt;

paithyaechā vāstraeibyō, atchā khvaetaove;

ashāunī ashavabyō, mananghō vangheush khvenvat, hanghush me be-et ush;

mazdāo dadāt ahurō, daenayāi vanghuyāi, yavōi vīspāi ā.

 

  1. Sākhvenī vazyamnābyō, kainibyō mraomī;

khshmaibyāchā vademnō, menchā-ī mãzdazdūm;

vaedōdūm daenābish, abyastā ahūm ye, vangheush mananghō;

ashā ve anyō ainīm, vīvenghatū tat zī hōi, hushenem anghat.

 

  1. Ithā ī haithyā narō, athā jenayō;

drujō hachā rāthemō, yeme spashuthā frāidīm;

drujō āyese hōish, pithā tanvō parā;

vayū-beredubyō, dush-khvarethem, nãsat khvāthrem;

dregvōdebyō dejīt-aretaeibyō, anāish ā manahīm ahūm, merengeduye.

 

  1. Atchā ve mīzhdem anghat, ahyā magahyā;

yavat āzhush zarazdishtō būnōit hakhtayāo;

parachā mraochãs aorāchā, yathrā mainyūsh dregvatō, anãsat parā;

ivīzayathā magem, tem at ve vayōi, anghaitī apemem vachō.

 

  1. Anāish ā duzh-vareshnanghō, dafshnyā hentū;

zakhyāchā vīspāonghō, khraosentãm upā;

hukhshathrāish jenerãm khrūnerãmchā, rāmãmchāāish dadātū, shyeitibyō vīzhibyō;

īratū īsh dvafshō hvō, derezā merethyāush mazishtō, moshuchā astū.

 

  1. Duzhvarenāish vaeshō rāstī tōi, narepish rajīsh,

aeshasā dejīt-aretā, peshō-tanvō,

kū ashavā ahurō, ye īsh jyāteush  hemithyāt, vase-itōishchā;

tat mazdā tavā khshathrem, yā erezhejyōi dāhī, drigaovevahyō.(Recite this stanza thrice).

 

  1. Vahishtā īshtish srāvī, zarathushtrahe,

spitāmahyā yezī hōi dāt āyaptā,

ashāt hachā ahurō mazdāo, yavōi vīspāi ā hvanghevīm;

yaechā hōi daben sashkenchā, daenayāo vanghuyāo ukhdhā shyaothanāchā. (Recite this stanza twice).

 

Ashem vōhū (3)

Vahishtōishtīm hāitīm yazamaide.

Vahishtōishtīm  gāthãm ashaonīm ashahe ratūm yazamaide.

Vahishtōishtayāo gāthayāo handātā yazamaide.

 

Yenghe hātãm āat yesne paitī vanghō,

mazdāo ahurō vaethā ashāt hachā,

yāonghãmchā tãschā tāoschā yazamaide.

 

(To be recited in bāj) Ahuramazda khōdāe, awazūnīe mardum, mardum sardagãn hamã sardagān hambāyaste vehān, ōem behedin māzdayasnãn āgahī āstavānī nekī rasānad; aedūn bād. (To be recited loudly) Yathā ahū vairyō (2)

 

Yasnemcha vahmemcha aojascha zavarecha āfrīnāmi, ahurahe mazdāo raevatō khvarenanghatō, ameshanãm spentanãm, gāthābyō spentābyō ratu-khshathrābyō ashaonibyō, ahunavaityāo gāthayāo, ushtavaityāo gāthayāo, spentā mainyeush gāthayāo, vohu-kshathrayāo gāthayāo, vahishtōishtōish gāthayāo, ashāunãm fravashinãm ughranãm aiwithūranãm, paoiryō-tkaeshanãm fravashinãm, nabā-nazdishtanãm fravashinãm. Ashem vohū (1). Ahmāi raeshcha; Hazangrem; Jasa me avanghahe; Kerfeh mōzd.

Advertisements